Idee

WhatsApp+Image+2019-05-24+at+23.18.43+(1).jpeg
 

Wos isch die Cave

Du hosch epas gemocht. Es isch persönlich und du hosch dir wirklich in Kopf zerbrochen um epas schianes und herzergreifendes zu mochn. Stellsch di iaz wirklich mit deinem Text auf die negschte Stroßenecke und posaunsch dein Werk ausn, dass di jeder hert? Guat, die Stroßenecke isch iaz vielleicht a bissl übertrieben. Wohrscheinlich londet decht lei di zerstückelte und ironische Version in irgend a Instagram Bio, de, wenn mon ehrlich isch, eh niamand lest.

DSC_0009.jpg

I bin do Benni und i find des schode. Seit über 20 Johr stea i auf do Bühne (Jo, 20 Johr, weil meine Eltern in oller besten Jugendtheaterverein in Südtirol hoben) und es isch decht vor jeder Aufführung is gleiche: I hon Lompmfiaber und muas mi zomreisen, dass i net pampig wer auf do Bühne. Weil i gern selber Texte schreib und Gschichten erzähl, hon i die Höhle gemocht. An Ort, wo lei Leit kemmen terfn, de epas von sich erzählen welln. Es isch donn ziemlich egal, wos du zu erzählen hosch. Du konnsch Liader singen, Gedichte vortrogn, epas wos du auf deine Reisen erleb hosch erzählen oder oanfoch erklären, dass Bus fohren net dein Ding isch und dir olm lustige Sochn passieren wenn dus probiersch. 

Du konnsch in die Höhle kemmen um a Liad zu probiern, wos du gern Live spielen tasch. Oder vielleicht hosch du a Idee für a Projekt wo du no net genau woasch wia du des in die Leit pitchen willsch. Vielleicht hosch du epas sponnendes erleb in an fernen Lond oder vielleicht gfollts dir oanfoch mit Leit de epas zu dazehlen hobm in oanen Raum zu sitzn und die Atmosphäre zu genießen (jo, mir hobm pro CaveStage 3 Zuschauerplätze frei).

Warum moch i des?

I find, dass mir in a Zeit leben, wo mon holbe Sochen geliefert kreg, weil mon donn no epas nochverkafn konn. A Zeit in der is Hondwerk koanen Wert mehr hot, weil mon konn jo oanfoch a bissl im Internet nochschaugn und gleich isch jeder a Experte. A Zeit, in der olles gleich vergessn werd, nochdem mons gsegen oder ghert hot. I find sell schode. I hon gern meine perfekten Sochn, de mi auf meinem Weg begleiten.I hon gern meine Hondwerker, de ihre Orbeit lernen und guat mochn welln. Und i genieß gern meine Veronstoltungen wo i zrug denkn konn und woas, dass i mit die besten Leit versuacht hon insere Gsellschoft weiter zu bringen. A wenn i “lei” dir die Meglichkeit geben hon epas auszuprobieren. 

Wenn des epas isch, wo du a Toal werden willsch, donn meld die zur negschten CaveStage un. Wenn du net selber auf do Bühne stian mechasch ober dir denksch:”I will, dasses de jungen Hupfer schoffn!” Donn kennen mir ins gern amol treffen und drüber reden wia du mein Projekt unterstützen konnsch oder wie viel a goldenes Schildl mit deinem Nomen auf do CaveWond der Unterstützer kostet ;)

I frei mi auf olles, wos mir gemeinsom no schoffen werden.

Enker Benni Troi